排比 層遞 頂真
排比 同層遞有咩分別？層遞同頂真又有咩唔同？分唔清楚呢三個修辭有咩分別、應該幾時用？今日學博小編同你將 排比 、層遞、頂真 三個修辭逐一剖析！快啲嚟學好呢三種修辭，DSE試場再見到佢哋就唔駛再怕啦！
排比
排比係種幾常用嘅修辭技巧，佢指嘅係將三個或以上結構相同或相似、語氣一致、意思相關嘅句子排列一齊。
佢嘅作用係用嚟加強語氣，加強表達效果，同埋增強表達嘅氣勢。排比嘅種類有兩種，分別係單句排比、同複句排比；亦都有講法認為可以分為三大類，分別係短語排比、句子排比同段落排比。不過我哋嚟緊將會集中講解單句排比同複句排比。
單句排比
將三個或以上結構相同或相似、語氣一致、意思相關嘅單一句子排列埋一齊。以「智者不惑，仁者不憂，勇者不懼」為例，就係將「智者不惑」、「仁者不憂」、「勇者不懼」呢啲單個嘅那一句子排列喺一齊，組成單句排比 。
複句排比
將三個或以上結構相同或相似、語氣一致、意思相關嘅複句排列埋一齊。以「爺孃聞女來，出郭相扶將。阿姊聞妹來，當戶理紅妝。小弟聞姊來，磨刀霍霍向豬羊」為例，就係將「爺孃聞女來，出郭相扶將」、「阿姊聞妹來，當戶理紅妝」、「小弟聞姊來，磨刀霍霍向豬羊」呢三個複句排列喺一齊。
層遞
層遞係指按照事物嘅性質，例如大小、長短、深淺、遠近、輕重等，進行層層遞升或者層層遞降嘅描寫。
佢嘅作用係去表達嘅內容逐步加深，令文章嘅表達更加流暢同有氣勢、更加一氣呵成，除咗加深情感表達，仲可以增加語言嘅感染力。
例子
以「古之欲明明德於天下者，先治其國；欲治其國者，先齊其家；欲齊其家者，先修其身；欲修其身者，先正其心；欲正其心者，先誠其意；欲誠其意者，先致其知」為例子，從國家、家庭、自己、個人內心、意念、知識，由大到小，層層遞降進行描述。
頂真
頂真，亦都可以叫頂針，係將上句嘅結尾用詞或者用字，用嚟做下句嘅開頭，即係「ABC，CDE」咁樣嘅格式。
佢嘅作用係令到句子嘅結構整齊，變得更緊湊、語氣貫通、同凸顯句子之間嘅聯繫性。
例子
以「歸來見天子，天子坐明堂」為例，前句嘅「天子」就做咗下句嘅開頭。以「軍書十二卷，卷卷有爺名」為例，前句嘅「卷」就做咗下句嘅開頭。
想知道其他修辭手法嘅用法同例子？睇埋我哋呢篇啦！
https://learnsmart.edu.hk/%e4%bf%ae%e8%be%ad-%e6%89%8b%e6%b3%95/
分別
排比&層遞
排比同層遞最直觀嘅差別就係，排比最低要求係三句；層遞就只係兩句。而且層遞比起排比嚟講更加有系統性，結構亦都更加完整，因為句子同事物間可以比較，而且有遞增遞減嘅順序。
以「天時不如地利，地利不如人和」同「竹林中，有人嬉戲，有人歇息，有人觀景。」呢兩個句子為例，喺前者入面更加顯而易見嘅係，天時地利人同和三者之間嘅重要性係有所不同嘅，地利比天時重要，人和又比地利更重要，後者入面就唔可以排列嬉戲、歇息、觀景何者較重要。
最後，呢兩個一個有趣嘅地方係，如果句子間同時符合排比同層遞嘅條件，咁嗰句就會被視為層遞。
層遞&頂真
層遞同頂真睇落可能冇乜分別，但係其實都有分別。層遞強調嘅係事物性質上嘅遞升或者遞降，而頂真就只係注重前句嘅結尾詞同後句嘅起首詞。前者係強調詞語之間嘅程度上嘅遞進或者遞減，而後者就注重前後兩句嘅緊湊度。
如果大家有什麼補習問題，如私人補習、網上補習好唔好，歡迎你可以隨時再跟我多交流一下，可以Follow 「學博教育中心 Learn Smart Education」 Facebook page同IG得到更多補習課程資訊，亦都可以上我們的補習網頁了解更多!
