【教科書】咩 書局 買書最好?買書攻略、優惠大放送!

書局 買書攻略、優惠

又到咗買教科書嘅時間啦!想知邊間 書局 買教科書最抵?想知點樣買先至可以最快攞到教科書?今日學博小編為你搜羅咗各類關於 書局 、買教科書嘅資訊,例如教科書折扣,買書嘅小貼士,咁樣就唔駛再煩惱點買教科書嘅事,輕鬆放暑假啦!

1. 教科書點買最好?

究竟去邊間 書局 買、點買教科書先最好?其實大部分學校都有自己嘅專屬書局,而大多數都會提供一條龍嘅訂書、攞書服務、部分仲會提供校內特惠折扣畀學生,好多時候係比出面買嘅平一大擳!

­ 

另外,因為大部分書商會以大批訂購嘅方式去處理校內訂嘅書,而唔係好似喺書局訂咁按需要分批訂購,所以跟學校咁校內訂購相對起喺其他書局買會快好多。

 

最後,大多數校內訂書嘅限期都係7月中旬左右,所以同學仔記得留意返學校派嘅訂書通告同學校嘅安排啦~!

2. 校本版

除此之外,部分學校會有校本版學校修訂版嘅課本,喺非學校所選嘅書商買有機會會比較貴或者比較耐先到貨,甚至乎訂購唔到都有可能。所以同學仔同家長訂書嘅時候記得要留意返啦~!

3. 其他買書途徑

萬一真係錯過咗校內訂書嘅期限點算?都唔駛咁擔心嘅~ 其實其他市面上嘅書店都有提供教科書訂購或者購買嘅服務,不過要留意返你搵嘅書局有冇賣教科書,最普遍嘅嘅選擇係三中商(又稱聯合新零售,即三聯、中華、商務),買之前最好上一上佢哋嘅網站、又或者致電佢哋嘅門市去查詢下,咁就唔駛白行一趟啦。

 

仲有,因為教科書種類繁多,而同一款教科書會有唔同嘅版次,而每間學校可能會按佢哋嘅課程而用唔同嘅版次,而店員都唔會知道邊間學校用邊款書,所以,為咗加快你買書嘅效率,同學仔去買教科書嘅時候,記得帶定學校有派嘅書單,咁就減少咗買書嘅時候嘅混亂!

 

另外,雖然喺暑假嘅時段好多有賣教科書嘅書局都會有做優惠,但並唔係間間都有架。不過唔駛擔心!學博小編都你搜羅咗以下一啲有折扣嘅書局,等你搵書嘅時候多啲選擇!

4. 二手書

想再慳多啲錢?大家不妨考慮下買二手書,特別係一啲非主科嘅偏次要科目,例如:音樂、宗教等,二手書嘅價格唔止更低,而且好多二手書都備受保養,冇太多用過嘅痕跡。所以,喺非主科科目選擇買二手書都係個幾唔錯又相對環保嘅方法~!

 

不過買之前記得要睇返書單上面嘅版次,同埋二手書嘅版次係咪相符,所以最好就記得帶齊書單去買書,咁就唔會買錯啦!

5. 教科書書局/書店推薦

5.1 檸檬書店

檸檬書店提供中小學新書零售服務,有一站式新教科書零售同訂購,呢間書店有齊全港大小出版社嘅中小學課本、作業同參考書籍,可避免家長同學四處頻撲買齊教科書,亦設有中小學新書八九折嘅購書優惠。

值得留意嘅係,檸檬書店嘅小學課本只發售給書店承辦嘅指定小學,所以想買小學教科書嘅家長同埋同學們,去之前可透過電話查詢或者前往網站了解清楚先。

網站:https://www.lemonbookshop.com/newbook
聯絡電話:2385 5777


5.2 漢榮書局

漢榮書局為中學教科書提供九二折嘅優惠,而且教科書都比較齊全,同學只需要打電話提供學校名稱就可以知道教科書嘅存貨情況,十分方便

值得留意嘅係,由於中學生購買課本需求大增,故此漢榮書局暫時只提供中學教科書及參考書銷售服務至915為止。

網站:https://www.honwing.hk/
聯絡電話:2391 0585

如果大家有什麼補習問題,如私人補習、網上補習好唔好,歡迎你可以隨時再跟我多交流一下,可以Follow 「學博教育中心 Learn Smart Education」 Facebook pageIG得到更多補習課程資訊,亦都可以上我們的補習網頁了解更多!

Leave a Reply

Your email address will not be published.