中英通用 閱讀報告 大秘笈
暑假又到啦！各位同學仔係咪煩惱緊暑期功課呢？ 閱讀報告 係好多人嘅暑期功課、亦都係最多人怕咗嘅一份功課，原因係好多人都覺得要睇晒本書好麻煩、又或者係唔知點樣入手。唔駛再驚啦！學博小編今日為大家整合咗幾個中英文通用嘅 閱讀報告 技巧，幫你喺呢個暑假順利KO閱讀報告！
閱讀報告寫作步驟
1.1 詳讀內文
首先，有時間嘅同學可以將成本書睇咗一次先，確保自己對成本書嘅架構已經有最基本嘅了解。另外，喺閱讀嘅過程可以試吓記下書中可以發揮嘅重點，方便之後寫作。
而冇時間、又或者係冇咁嘅耐性嘅同學仔，就可以選擇用其他嘅方法去了解你想寫嘅書嘅架構。以下我哋有幾個方法畀大家出下cheat～
1.1.1睇頭尾兩章如果同學抽唔到時間嚟睇晒成本書嘅話，不妨試吓只係睇本書嘅頭尾兩章，了解本書嘅開首同結尾、畀同學可以對成本書嘅內容有大概嘅認識。呢啲內容足以幫同學寫出一篇完整嘅閱讀報告。
1.1.2中譯版如果係英文書嘅情況，同學可以試吓睇佢哋嘅中譯版，了解咗故事再用英文寫出閱讀報告。但係同學要注意，書籍英譯版入面，唔同譯者有唔同嘅譯法，翻譯並唔係想像中咁簡單。
1.1.3網上分析如果同學嘅時間真係非常有限，又想臨急抱佛腳嘅話，咁就只可以喺網上搵嗰本書嘅分析，再喺睇完其他人對文本嘅分析之後，學生就可以自己寫對本書嘅感受。因為由專業或者精英讀者，例如係大學文學院生或者教授等寫嘅評論，佢哋可能會比一般學生搵得到更多書入面嘅線索，或者睇到書入面更多角度。
1.2 確立論題及立場
之後就可以確立寫作嘅論題同個人立場，同學可以根據自己嘅閱讀感受去揀一個最感興趣嘅角度去寫，揀嘅角度要小而深。另外，揀嘅立場唔可以模稜兩可，需要有見地咁讚賞或者批評。如果讚賞就需要觸及書入面最獨到、亮眼嘅特色。而如果要批評，就需提出具說服力嘅論點。
1.3 收集資料
然後就係收集資料，想寫好閱讀報告，除咗要對嗰本書有比較透徹嘅了解之外，仲要對作者、佢所處嘅時代、寫作嘅背景有所了解。同學可以參考嗰位作者嘅自傳或者佢嘅其他作品。包括摘錄原著入面嘅相關內容、相關書籍、雜誌、或者上網搜索。
1.4 以自己文字表達
最後係要把握書嘅要點，再用自己嘅文字去加以組織、整理同表達，另外行文要流暢，觀點要同論述一致。唔應該引用太多內文或者其他人嘅意見，更加唔可以抄襲或者造假。
中文閱讀報告結構
一般中文閱讀報告嘅格式如下：
- 書名、作者、出版社（視乎學校要求）
- 內容概要（整合全本書內容）
- 閱讀心得（本書嘅特別之處），例如：
深刻嘅部分
作者想傳遞嘅訊息
個人喜愛嘅部分
對書本嘅評價同觀感
- 讀後感，例如：
引起嘅聯想
引起嘅疑問
對你嘅提醒、啟發
對你思想上嘅轉變
引發嘅期望
- 從本書有何收穫
英文閱讀報告結構
英文閱讀報告嘅格式同上面提及到嘅大同小異，如下：
- Title of book (書名), Author of the book (作者)
- Setting (背景) and Plot (大綱)
- What did you learn from the story? (學到啲咩？)
- The characters you admire most and why? (最欣賞邊個人物，點解？)
- Did you enjoy this book, would you like to recommend it to others, why or why not? (你鍾唔鍾意呢本書，又會唔會推介佢，點解？)
- What advice would you give the author of this book? (有咩意見畀作者？)
如果大家有什麼補習問題，如私人補習、網上補習好唔好，歡迎你可以隨時再跟我多交流一下，可以Follow 「學博教育中心 Learn Smart Education」 Facebook page同IG得到更多補習課程資訊，亦都可以上我們的補習網頁了解更多!
